Þess vegna er ég félagi
Zonta kona
Ég var nýbyrjuð að starfa í Akureyrarakademíunni og þar starfaði einnig zontakona og þá starfandi formaður klúbbsinns Aðalheiður Steingrímsdóttir. Hún bauð mér með fljótlega á fund í klúbbnum. Ég varð strax heilluð af samfélaginu sem Zontahreyfingin býður upp á og því fallega samstarfi sem þar fer fram. Ég skráði mig í klúbbinn á fyrsta fundi. Ég hafði langa reynslu af starfi innan kvenfélags Reykdæla og vissi því vel hversu mikilvægt er að vinna þau verk sem okkur konum eru svo sýnileg í samfélaginu.
Ég starfa hjá mínu eigin fyrirtæki sem heitir Huldustígur ehf. og er ein starfandi þar, og fann því ennþá betur fyrir því hversu mikilvægt það var fyrir mig að tilheyra þessum félagsskap. Ég fann fyrir miklum stuðningi hjá félagskonum og áhuga á því sem ég er að starfa við og ég fékk fljótlega tækifæri á því að kynna mína starfsemi fyrir þeim og hef gert nokkrum sinnum á síðustu árum. Sú reynsla að kynna starfsemi fyrirtækisins fyrir þessum hópi hefur reynst mér gífurlega vel og finn ég mikin stuðning og hvatningu í minn garð. Ég flutti úr Reykjadal til Akureyrar 2019 og er því aðkomukona , það að vera boðið að taka þátt í svona öflugu fégasstarfi í nærsamfélaginu er frábært og virkilega gott að alþjóðlegum samtökum sem stuðla að velferð kvenna og styrkja þeirra réttindi í leik, menntun og starfi. Í klúbbnum kynntist ég konum sem ég annars hefði ekki kynnst. Ég fer alltaf full tilhlökkunar á fundi og í félagsstarfi með mínum félgaskonum og fer alltaf mjög sæl heim að fundi loknum.
Garðyrkjufræðingur og heilari
Fyrir mörgum árum síðan sá ég viðtal við Zontakonur á N4 þar sem þær voru að fara yfir málefni og baráttumál Zonta. Þessi málefni snertu virkilega við mér og ég ákvað með sjálfri mér að þegar ég „yrði stór“ ætlaði ég mér að ganga í Zonta. Það var svo fyrir hendingu að ég bankaði upp á Oddeyrarskóla einn góðan nóvemberdag þar sem ég heyrði mikil hlátrasköll og fann ilmandi laufabrauðslykt. Það má segja að ég hafi runnið á lykt og hljóð. Þar voru saman komnar Zontakonur í Þórunni hyrnu að baka laufabrauð. Ég óskaði eftir að fá að ganga í klúbbinn og þá var ekki aftur snúið.
Verkefnin eru fjölbreytt og gefandi. Klúbbstarfið gefur tækifæri á að kynnast konum sem ég myndi allra jafnan ekki kynnast. Ég er því með hverju árinu, ríkari af þekkingu, reynslu og vináttu Zontakvenna.
Sesselja Sigurðardóttir, leikskólakennari